د عامه خدمتونو کمېسیون دې ټولې دندې ژر تر ژره پر میرټ ډکې کړي: پښتونخوا ملي عوامي ګوند

کوټه (ویب نیوز) د پښتونخوا ملي عوامي ګوند صوبایي سیکرټریټ په یوه خپره کړې اعلامیه کې د بلوچستان پبلک سروس کمېسیون له لارې د تحصیلدارانو او نورو دندو د ګمارنې د بهیر د درېدلو، د ټېسټونو او مرکو په ترسره کولو کې د ځنډ او د نوماندانو او ځوانانو ترمنځ د سختو اندېښنو پر رامنځته کېدو ژوره اندېښنه څرګنده کړې او ویلي یې دي چې حکومت باید د میرټ د له منځه وړلو له ناسم اقداماتو ډډه وکړي او د واقعي بریالیو نوماندانو د مرکو پړاو بشپړولو وروسته دې د حقدارو کسانو ګمارنه پر میرټ یقیني کړي. په بیان کې ویل شوي چې له اوږدې مودې راهیسې په صوبه کې زرګونه دندې د ګمارنې په تمه دي، خو حکومت د دغو دندو د پر میرټ ډکولو او تعلیم‌یافته، وړ او باصلاحیته ځوانانو ته د روزګار برابرولو پر وړاندې په پرله‌پسې توګه خنډونه جوړوي. د اوږدې مودې لپاره پبلک سروس کمېسیون له چیئرمین پرته چلول کېده او اوس چې د ادارې مشر ټاکل شوی او د بېلابېلو محکمو د زرګونو تشو دندو د ډکولو لپاره د ټېسټ او مرکې لړۍ پیل شوې، حکومت پکې خنډونه رامنځته کوي. د تحصیلدار د دندو لپاره شاوخوا ۲۴ زره نوماندانو ټېسټ ورکړی و چې له هغوی څخه نږدې ۱۲۰۰ نوماندانو په ټېسټ کې بریا ترلاسه کړې، خو له اوږدې مودې راهیسې یې مرکې نه دي ټاکل شوې چې د نوماندانو د اندېښنې سبب ګرځېدلې ده. په بیان کې ویل شوي چې پبلک سروس کمېسیون د بې‌روزګاره ځوانانو وروستۍ هیله ده او د دې ادارې د کمزوري کولو، د ټېسټونو او مرکو او د دندو د ډکولو په بهیر کې د خنډونو رامنځته کولو موخه په اصل کې له کمېسیون څخه د واکونو بېرته اخیستل او بیا د محکمو له لارې د قراردادي او اېډهاک تګلارې له مخې ګمارنې کول دي، چې په هېڅ صورت د منلو وړ نه دي. پښتونخوا ملي عوامي ګوند ویلي چې ګوند پر میرټ باور لري او له پبلک سروس کمېسیون څخه هم هیله لري چې د خپلې ادارې اعتبار وساتي او د میرټ له مخې ټولې دندې ژر تر ژره ډکې کړي، څو له یوې خوا بې‌روزګاري راکمه شي او له بلې خوا د بې‌روزګاره ځوانانو او نوماندانو اندېښنې پای ته ورسېږي.