د میر عبدالرحمان لانګو شهادت بزدلانه عمل دی، قاتلان به د قانون منګولو ته سپارل کېږي: میر ضیاءالله لانګو

کوټه (ویب نیوز) د بلوچستان د کورنیو چارو صوبایي وزیر میر ضیاءالله لانګو د بلوچستان عوامي ګوند د نوشکي ولسوالۍ د مشر او د باغک یونین کونسل د چیئرمین میر عبدالرحمان لانګو د وسله والو په ډزو کې د شهادت په کلکه غندنه کړې او ویلي یې دي چې ترهګر له هر هغه چا سره دښمني لري چې د بلوچ ولس د خدمت، هوساینې او د هغوی د ستونزو د حل لپاره عملي هڅې کوي. نوموړي په خپل غندنیز بیان کې وویل، هغه کسان چې ځانونه د بلوچ دودونو پلویان بولي، د کور حرمت یې تر پښو لاندې کړی او د ښځو او ماشومانو په وړاندې یې د میر عبدالرحمان لانګو په کور کې دننه هغه په نښه او شهید کړی، چې دا یو ډېر ناوړه او بزدلانه عمل دی. هغه وویل، شهید میر عبدالرحمان لانګو یو صادق، مخلص، ټولنیز فعال او د ولس دوست شخصیت و، چې سهار او ماښام به د خلکو ترمنځ موجود و او د بېوزلو او مستحقو کسانو د ستونزو د حل لپاره یې هره ممکنه هڅه کوله. د یونین کونسل د چیئرمین په توګه یې ولسي خدمت خپل مسؤلیت باله او د سیمې د خلکو د ستونزو د حل لپاره یې مهم رول ادا کړ. د بلوچستان عوامي ګوند د حکومت پر مهال یې د نوشکي د بې روزګاره بلوچ ځوانانو لپاره د کار زمینه برابرولو او هغوی ته د دولتي دندو په ترلاسه کولو کې هم مهمه ونډه لرله، چې له امله یې د سیمې سلګونه کورنۍ ګټه‌منې شوې. میر ضیاءالله لانګو وویل، ترهګر غواړي هغه ټول کسان په نښه کړي چې د بلوچ ولس ترڅنګ ولاړ دي، خو دا عناصر د ولس خدمتګاران نه شي کمزوري کولی. نوموړي د شهید میر عبدالرحمان لانګو له کورنۍ او خپلوانو سره د زړه له کومې خواخوږي او ډاډګېرنه څرګنده کړه او ویې ویل چې د هغه ولسي خدمتونه به تل یاد ساتل کېږي او قاتلان به د قانون منګولو ته سپارل کېږي.