پنجاب ته له ګاونډیو صوبو نه، بلکې د پنجابي استعمار له واکمنۍ محکومو قومونو ته خطر دی: احمد خان

کوټه (ویب نیوز) د افغان قومي تحریک مشر احمد خان د پنجاب وزیراعلیٰ مریم نواز د هغه بیان په اړه سخت غبرګون ښودلی چې ویلي یې وو پنجاب ته د «فتنه الهنـد» په پرتله له ګاونډیو صوبو څخه زیات خطر دی. احمد خان ویلي چې پنجاب ته له ګاونډیو صوبو هېڅ خطر نشته، بلکې محکومو صوبو ته د پنجابي استعمار له امله خطر متوجه دی. نوموړي په خپل بیان کې تور ولګاوه چې پنجاب د خپلو داخلي او بهرنیو کمزورو تګلارو له امله هېواد ته د متوجه ګواښونو او ناکامیو پړه پر ګاونډیو صوبو اچولو ناکامه هڅه کوي. هغه وویل، که پنجاب غواړي پښتون، بلوچ او سندهي قومونه له ځان څخه جلا وګڼي، نو باید په دې اړه جرئت وکړي، ځکه د دغو قومونو په منځ کې د دې احتمال په اړه له وړاندې جدي فکر موجود دی. احمد خان وویل چې د پاکستان له جوړېدو راهیسې ځینو قوتونو هڅه کړې چې وفاقي ریاست د پنجاب د واکمنۍ نښه وګرځوي، چې له امله یې نورو صوبو له سیاسي، اقتصادي او اداري محرومیو سره مخامخ شوي دي. د هغه په وینا، په بېلابېلو دولتي ادارو او د پرېکړو په مرکزونو کې د واک غیر متوازن تمرکز د وفاقي واحدونو ترمنځ د بې باورۍ سبب شوی دی. نوموړي ادعا وکړه چې د کمزورو تګلارو او دوه‌ګوني سیاست له امله د هېواد ادارې له بحرانونو سره مخ دي، په داسې حال کې چې د ولس د سر او مال د خوندیتوب او د قانون د واکمنۍ په اړه هم جدي پوښتنې موجودې دي. د افغان قومي تحریک مشر وویل چې په داسې شرایطو کې د یوه صوبې د وزیراعلیٰ له لوري د هېواد خپل وفاقي واحدونه د خطر په توګه وړاندې کول د اندېښنې وړ دي. هغه وویل، پښتانه، بلوچ او سندهي قومونه د شرخوښو یا ترهګرو په توګه وړاندې کول او د بېلابېلو نومونو لاندې د هغوی پر وړاندې د زور کارول د ستونزو حل نه، بلکې د لا ډېرو پېچلتیاوو سبب کېږي. احمد خان له مریم نواز څخه غوښتنه وکړه چې د خپل بیان او تګلارو پر پایلو جدي غور وکړي او ویې ویل چې د وفاق د پیاوړتیا لاره د صوبو د یو بل پر وړاندې درولو پر ځای په برابري، اساسي قانوني حقونو، سیاسي عدالت او متقابل درناوي کې ده.