په پاکستان کې ۳۷ شرکتونه ګرځنده ټیلیفونونه جوړوي، له درې نیم کروړو ډېر ټیلیفونونه جوړ شوي

کوټه (ویب نیوز) د ملي اسمبلۍ د معلوماتي ټکنالوژۍ او مخابراتو د دایمي کمېټې په غونډه کې د انجینري پراختیا بورډ مشر وویل چې په پاکستان کې ۳۷ شرکتونه ګرځنده ټیلیفونونه جوړوي او تر اوسه له درې نیم کروړو ډېر ګرځنده ټیلیفونونه جوړ شوي دي. نوموړي وویل چې د یوه امریکايي شرکت پرته ګڼ شمېر شرکتونه په پاکستان کې د ټیلیفونونو په جوړولو بوخت دي او د امریکايي شرکت د راوستلو لپاره هم هڅې روانې دي، چې وزیراعظم به امریکا ته د سفر پر مهال د دغه شرکت له مشر سره لیدنه وکړي. د کمېټې مشر وویل چې په پاکستان کې د ګرځنده ټیلیفونونو جوړېدل د خوښۍ وړ خبره ده او باید په هېواد کې جوړېدونکي ټیلیفونونه ارزانه او معیاري وي، ځکه موخه باید د هر وګړي لپاره د سمارټ فون برابرول وي. هغه وویل چې په پاکستان کې د ګرځنده ټیلیفونونو د جوړونکو شرکتونو شمېر زیاتولو ته اړتیا ده او اوس باید د درې جي پر ځای د څلور جي او پنځه جي ټیلیفونونو جوړولو ته پاملرنه وشي. د کمېټې د مشر په وینا، اوس مهال په پاکستان کې شاوخوا ۲۰ کروړه کسان ګرځنده ټیلیفونونه کاروي او په ښارونو کې د ټیلیفونونو د غلا او چور له امله خلک اړ کېږي چې نوي ټیلیفونونه واخلي، نو ځکه په هېواد کې جوړېدونکي ګرځنده ټیلیفونونه باید ارزانه او د ښه کیفیت لرونکي وي.