احتمالي هوايي برید: د ریاض هوايي ډګر ته څېرمه د لوګي تورې ورېځې، د چاودنو غږونه

کوټه(ویب نیوز) د سعودي عربستان په پلازمېنه ریاض کې د شنبې په ورځ هوايي ډګر ته څېرمه د چاودنو غږونه اورېدل شوي او د سیمې له بېلابېلو ځایونو د لوګي تورې ورېځې پورته کېدې. د رویټرز د راپور له مخې، د ریاض هوايي ډګر لویې لارې، مرکزي ترمینل او نورو تاسیساتو ته څېرمه تور لوګی او په ځینو ځایونو کې د اور لمبې هم لیدل شوې دي. سعودي ملکي دفاع ادارې په ریاض او الخرج کې د احتمالي هوايي بریدونو د خطر له امله خلکو ته خبرداری ورکړی و، خو وروسته یې د وضعیت د عادي کېدو پیغام هم خپور کړ. سعودي حکومت تر اوسه د پېښې په اړه سمدستي څرګندونې نه دي کړي. د سیمې د وروستیو ترینګلتیاوو او پر سعودي عربستان د حوثیانو د بریدونو د ادعاوو له امله امنیتي اندېښنې زیاتې شوې دي.