بلوچستان: په دوو ورځو کې د مرستیال کمېشنر او پولیس سرتېرو په ګډون ۲۰ کسان تښتول شوي

کوټه(وېب نیوز) د بلوچستان په بېلابېلو ضلعو کې د شنبې او یکشنبې په ورځو کې د لږ تر لږه ۲۰ کسانو د تښتول کېدو راپورونه ورکړل شوي چې پکې د خاران مرستیال کمېشنر منیر احمد سومرو، اووه پولیس سرتېري، دوه کرکټ لوبغاړي، دوه د ټرک چلوونکي او نور ملکي کسان شامل دي. د خاران مرستیال کمېشنر له کوټې څخه خاران ته د تګ پر مهال د پتکن برشونکي په سیمه کې له خپل ګن مېن محمد یوسف، د پولیسو له موټرچلوونکي پیرک او یوه ملکي مېلمه نصرالله سره یوځای تښتول شوی، په داسې حال کې چې له پنجپایي، مستونګ او چاغي څخه د پولیسو د سرتېرو د تښتول کېدو راپورونه هم ورکړل شوي دي. له خضدار زېدي، هرنایي شاهرګ، سیوي بختیار اباد او سوراب مل مدرسې څخه هم د ملکي کسانو او د ټرک چلوونکو د تښتول کېدو اطلاعات ترلاسه شوي، او د ډیره بګټي په سیمه کې د سوئي دوه ځايي کرکټ لوبغاړي دادن بګټي او ذاکر حسین بګټي هم تښتول شوي دي. بل لور ته امنیتي ځواکونو ادعا کړې چې په قلات کې یې د عملیاتو پر مهال څو ورځې مخکې تښتول شوي د ټرک او موټرو چلوونکو په ګډون ۲۳ کسان خوشې کړي او شپږ کانټینرونه، درې بسونه او دوه موټر یې هم ترلاسه کړي دي، په داسې حال کې چې د عملیاتو پر مهال د دوو مشکوکو کسانو د وژل کېدو راپور هم ورکړل شوی دی. له نوشکي څخه یوه میاشت مخکې تښتول شوی کونسلر جانان بړېڅ هم د یکشنبې په ورځ د خوشې کېدو راپور ورکړل شوی دی.