جوماتونه او مدرسې د اسلام کلاګانې دي، ساتنه یې د ټولو ګډ مسؤولیت دی، ذوالفقار طارقي

کوټه(وېب نیوز) د اهل سنت والجماعت مشر ذوالفقار علي طارقي قادري له خپلو ملګرو سره د سبي دارالعلوم محمدیه غوثیه له مهتمم اعلیٰ سید ریاض حسین شاه او د جامعې له خطیب سید فیاض علي شاه سره لیدنه وکړه. نوموړي په دې موقع وویل چې جوماتونه او دیني مدرسې د اسلام کلاګانې دي او ساتنه یې د ټولو ګډ مسؤولیت دی. هغه وویل چې جوماتونه او مدرسې د اسلامي زده کړو او روزنې مهم مرکزونه دي او مسلمانان له دغو ادارو سره دیني، اخلاقي او روحي اړیکې لري، نو د علماوو او دیني ادارو پر ضد د منفي تبلیغ پر ځای باید د هغوی مثبت تعلیمي او اصلاحي رول روښانه شي. ذوالفقار طارقي وویل چې د دیني ارزښتونو د ساتنې لپاره باید علماوو او ولس خپل مسؤولیت ادا کړي او په ټولنه کې د مذهبي زغم، متقابل درناوي او دیني زده کړو د پراختیا لپاره هڅې وشي.