حق مهر د مېرمنې قانوني حق دی، نکاح نامه د حقونو د ثبوت سند دی: سپریم کورټ

اسلام‌اباد (ویب نیوز) سپریم کورټ ویلي چې حق مهر د مېرمنې لازمي او ځانګړی مالي حق دی او خاوند یا د هغه خپلوان د مېرمنې له آزادې رضا پرته دغه حق ختمول یا معاف کولای نه شي. د جسټس شاهد وحید په مشرۍ څلور کسیز بینچ په بېلابېلو قضیو کې د پرېکړې پر مهال ویلي چې نکاح یوازې یو عادي مدني تړون نه، بلکې یو ځانګړی قانوني بنسټ دی او نکاح نامه د مخکې ترسره شوې نکاح او د هغې د شرطونو رسمي ثبوت ګڼل کېږي. محکمې ویلي، که غیر منقوله ځمکه یا جایداد د حق مهر په توګه ټاکل شوی وي خو وروسته مېرمنې ته انتقال نه شي، د خاوند د مهر ورکولو مسؤلیت نه ختمېږي، بلکې هغه باید ټاکل شوې بیه ورکړي او که بیه نه وي ټاکل شوې، محکمه د اړوند وخت د جایداد د بازار ارزښت ټاکلای شي. سپریم کورټ څرګنده کړې چې د نکاح نامې بېلابېل خانې باید په ګډه او له یو بل سره په همغږۍ تفسیر شي او هغه لوری چې د کوم ثبت شوي معلوماتو د مبهم، ناسم یا نیمګړي کېدو ادعا کوي، باید پرې روښانه او باوري شواهد وړاندې کړي. محکمې ویلي چې په نکاح نامه کې د جایداد ثبتول عموماً د حق مهر د انتقال د تړون یا ژمنې ثبوت وي او یوازې د تخنیکي تېروتنې له امله د مېرمنې ثابت شوي حقوق له منځه نه شي تلای.