په ۲۰۲۶ کال کې د پرمختیايي هېوادونو لپاره ۱۱۲ میلیارده ډالره شخصي پانګه راجلب شوې، نړیوال بانک

اسلام‌اباد (ویب نیوز) نړیوال بانک ډلې د ۲۰۲۶ مالي کال پر مهال د پرمختیايي هېوادونو لپاره د ریکارډ په کچه ۱۱۲ میلیارده ډالره شخصي پانګه راجلب کړې، په داسې حال کې چې د نړیوال بانک خپله مالي مرسته هم ورسره یوځای شي، نو ټوله مالي مرسته او راجلب شوې پانګه له ۲۰۰ میلیارده ډالرو اوښتې ده. د نړیوال بانک له مخې، په ۲۰۲۲ مالي کال کې له خصوصي سکتور څخه راجلب شوې پانګه ۳۵ میلیارده ډالره وه چې په ۲۰۲۶ کال کې ۱۱۲ میلیارده ډالرو ته لوړه شوه. د ټیټ منځني عاید لرونکو هېوادونو لپاره دا پانګه له ۱۴ میلیارده څخه ۳۷ میلیارده ډالرو او د لوړ منځني عاید لرونکو هېوادونو لپاره له ۱۲ میلیارده څخه ۵۰ میلیارده ډالرو ته لوړه شوې ده. په افریقا کې هم دغه پانګه له ۹ میلیارده څخه ۲۲ میلیارده ډالرو ته رسېدلې، خو په ټیټ عاید لرونکو هېوادونو کې شاوخوا ۳ میلیارده ډالره پاتې شوې ده. نړیوال بانک ډلې په ۲۰۲۶ مالي کال کې له ۲۵ میلیارده ډالرو زیاتې ضمانتونه هم ورکړي دي. د نړیوال بانک ډلې مشر اجې بنګا ویلي چې په تېرو درېیو کلونو کې له خصوصي سکتور سره د کار طریقه چټکه، اسانه او همغږې شوې او موخه یوازې د زیاتې پانګې راجلبول نه دي، بلکې هغه اقتصادونو ته یې رسول دي چې د کار او اقتصادي فرصتونو د رامنځته کېدو زمینه برابروي. د نړیوال بانک په وینا، په راتلونکو ۱۰ تر ۱۵ کلونو کې به په پرمختیايي هېوادونو کې شاوخوا ۱.۲ میلیارده ځوانان د کار عمر ته ورسېږي او تمه ده چې په همدې موده کې شاوخوا ۴۲۰ میلیونه دندې رامنځته شي، چې له هرو لسو څخه نهه دندې یې خصوصي سکتور رامنځته کوي.