کوټه (ویب نیوز) د پاکستان وزیراعظم شهباز شریف د ملګرو ملتونو د عمومي اسمبلۍ د ۸۱مې غونډې ته په وینا کې وویل چې د سولې لپاره د پاکستان هڅې نه ستړې کېدونکې دي او د جګړې پر ځای باید ډیپلوماسۍ ته لومړیتوب ورکړل شي. نوموړي د منځني ختیځ د جګړې، له سعودي عربستان سره د یووالي، د کشمیر مسئلې او د فلسطین د وضعیت په ګډون پر نړیوالو او سیمهییزو موضوعاتو د پاکستان دریځ بیان کړ. شهباز شریف وویل چې د هرمز تنګی او باب المندب د نړۍ د اقتصاد مهمې لارې دي او د سولې هڅه تر ټولو سپېڅلی هدف دی. هغه وویل چې پاکستان د واشنګټن او تهران په نږدې کولو او د خبرو مېز ته د دواړو خواوو په راوستلو کې رول لوبولی او د فیلډ مارشل جنرال عاصم منیر ډیپلوماټیکې هڅې د یادونې وړ دي. وزیراعظم پر سعودي عربستان د حوثیانو بریدونه وغندل او ویې ویل چې پاکستان له سعودي عربستان سره یووالی څرګندوي، په داسې حال کې چې حرمین شریفین د مسلمانانو لپاره سره کرښه ده. نوموړي وویل چې د مکې تړون د پاکستان د سولې د غوښتنې څرګندونه کوي او د ډیپلوماسۍ غږ باید لا پیاوړی شي. شهباز شریف د هند او پاکستان د کړکېچ یادونه وکړه او ویې ویل چې په جنوبي اسیا کې د تلپاتې سولې لپاره د کشمیر د مسئلې حل اړین دی. هغه زیاته کړه چې د سند طاس سیسټم اوبه د پاکستان د ژوند لپاره حیاتي دي او د اوبو د بندولو هره هڅه به د جګړې په توګه وکتل شي. وزیراعظم د کشمیریانو د ملاتړ ژمنه تکرار کړه او ویې ویل چې کشمیر د پاکستان شه رګ ده. نوموړي پر فلسطینیانو د اسرائیلي اقداماتو یادونه هم وکړه او پر نړیوالې ټولنې یې د سولې، ډیپلوماسۍ او د انساني ژوند د ساتنې لپاره د خپل رول د ترسره کولو ټینګار وکړ.
