سوله او سیاسي ثبات په زور نه شي راوستل کېدای، پروفېسر حلیم صادق

کوټه (ویب نیوز) د عوام پاکستان ګوند بلوچستان صوبایي عمومي سیکرټري پروفېسر ډاکټر حلیم صادق ویلي چې هېواد له سیاسي، اقتصادي او امنيتي ننګونو سره مخ دی او په داسې شرایطو کې باید ټول سیاسي قوتونه او دولتي ادارې ملي ګټې، د آئین برلاسي او د ولس د ستونزو حل ته لومړیتوب ورکړي. نوموړي له خبریالانو سره په خبرو کې وویل چې ګراني، بې روزګاري، د برېښنا او ګاز ستونزې او د کاروباري فعالیتونو مشکلاتو د عامو خلکو ژوند اغېزمن کړی دی او حکومت باید داسې اقتصادي تګلارې غوره کړي چې ګټې یې عام ولس ته ورسېږي. هغه وویل بلوچستان له طبیعي سرچینو ډک دی، خو ولس یې لا هم د تعلیم، روغتیا، روزګار، پاکو اوبو، برېښنا، ګاز او سړکونو په ګډون له بنسټیزو اسانتیاوو سره ستونزې لري. نوموړي غوښتنه وکړه چې د صوبې له سرچینو څخه ترلاسه کېدونکو ګټو کې دې ځايي خلکو ته اغېزمن او عادلانه برخه ورکړل شي او په معدني او نورو پروژو کې دې ځوانانو ته د روزګار او مسلکي زده کړو فرصتونه برابر شي. پروفېسر حلیم صادق وویل چې په بلوچستان کې د دوامدارې سولې لپاره یوازې امنیتي اقدامات بسنه نه کوي، بلکې د ولس باور، سیاسي ګډون، انصاف، تعلیم، روزګار او اقتصادي پرمختګ ته هم باید پاملرنه وشي. هغه پر دې ټینګار وکړ چې سیاسي اختلافات دې د دښمنۍ پر ځای د خبرو اترو او ملي مکالمې له لارې حل شي.