د سردار محمد اسلم بزنجو پر کور برید د بلوچستان له دودونو سره په ټکر کې دی، نیشنل ګوند

کوټه(ویب نیوز) نیشنل ګوند د مرکزي مشر او پخواني صوبايي وزیر سردار محمد اسلم بزنجو په نال کې پر کور د برید غندنه کړې او ویلي یې دي چې پر کور برید د بلوچستان له دودونو او د چادر او څلور دېوالۍ له درناوي سره په ټکر کې دی او د حالاتو د لا خرابېدو سبب کېدای شي. د ګوند صوبايي ویاند له حکومته غوښتنه کړې چې برید کوونکي ژر تر ژره ونیسي او د قانون له مخې دې سزا ورکړل شي. ویاند ویلي چې نیشنل ګوند یوه سوله ییزه سیاسي ډله ده او د میر غوث بخش بزنجو د عدم تشدد فلسفه تعقیبوي، خو د سیاسي مشرانو ځورول او د هغوی د کورونو د حرمت ماتول د منلو وړ نه دي. نوموړي وویل چې اختلاف نظر د هر چا جمهوري حق دی او نیشنل ګوند به د بلوچستان د سیاسي، اقتصادي او قومي ستونزو د حل لپاره خپله سیاسي مبارزه په پارلمان کې دننه او بهر روانه ساتي.