ډېره بګټي کې برید شنډ، ۱۳ وسله وال وژل شوي، له دوکۍ ۱۸ کارګر تښتول شوي

ډېره بګټي/دوکۍ (ویب نیوز) د بلوچستان په ډېره بګټي او دوکۍ ولسوالیو کې د وسله والو په بېلابېلو بریدونو کې ۱۳ وسله وال وژل شوي، د بګټي امن ځواک یو سرتېری شهید او یو شمېر نور ټپیان شوي، په داسې حال کې چې په دوکۍ کې د یوې ساختماني کمپنۍ له کېمپ څخه ۱۸ کارګران تښتول شوي دي. د امنیتي سرچینو په وینا، د ډېره بګټي د بیکر سیمې کې د ولسوالۍ د شورا د مشر وډېره غلام نبي شمباني پر استوګنځي وسله والو برید وکړ، خو د بګټي امن ځواک په ځوابي کارروایي سره برید شنډ کړ. د تېښتې هڅه کوونکي بریدګر تعقیب شول او د ډزو په تبادله کې ۱۳ وسله وال ووژل شول، په داسې حال کې چې د امن ځواک یو سرتېری شهید او درې نور ټپیان شول چې د درملنې لپاره کراچۍ ته ولېږدول شول. په همدې ولسوالۍ کې پر یوه شخصي کمپنۍ د برید پر مهال د امنیتي ځواکونو په ځوابي کارروایي کې څلور نور وسله وال هم ووژل شول، یو امنیتي سرتېری شهید او دوه نور ټپیان شول. بلخوا د دوکۍ په تحصیل کې وسله والو د یوې ساختماني کمپنۍ پر کېمپ برید وکړ، ماشینري یې وسوځوله او ۱۸ کارګران یې له ځان سره نامعلوم ځای ته یوړل. قانون پلي کوونکو ادارو د پېښو سیمې محاصره کړې او د تښتول شویو کارګرانو د موندلو او د وسله والو د لټون لپاره یې عملیات پیل کړي دي.