د بیان ازادۍ لپاره اسلام آباد هایکورټ کې د رسنیو مرکز جوړ شو، چیف جسټس

اسلام آباد(ویب نیوز) د اسلام آباد هایکورټ چیف جسټس سردار محمد سرفراز ډوګر ویلي چې د بیان ازادۍ لپاره په اسلام آباد هایکورټ کې د رسنیو مرکز جوړ شوی چې خبریالان کولای شي هلته خپله خبره او نظر وړاندې کړي. له رسنیو سره په خبرو کې نوموړي وویل چې پر محکمې هر ډول نیوکه کېدای شي او د نیوکې مخه نه نیول کېږي. چیف جسټس وویل چې منفي خبرې زیاتې لیدنې ترلاسه کوي، خو رسنۍ باید مثبت اړخونه هم خلکو ته ورسوي. نوموړي وویل چې د ژېړې ژورنالیزم پر ځای باید جدي او مسلکي ژورنالیزم ته وده ورکړل شي. د اسلام آباد هایکورټ د رسنیو د مرکز د پرانیستې په مراسمو کې د محکمې چارواکو، وکیلانو او د محکمې خبریالانو هم ګډون کړی و.