د باني پي ټي آی له خوا د ټي ټي پي بېرته راوستلو تر شا ناوړه موخې وې، خواجه آصف

اسلام‌اباد (ویب نیوز) د دفاع وفاقي وزیر خواجه محمد آصف ادعا کړې چې د پي ټي آی د باني له خوا د تحریک طالبان پاکستان د بېرته راوستلو او په خیبر پښتونخوا کې د بیا مېشتولو تر شا ناوړه موخې وې. نوموړي پر ټولنیزو رسنیو په یوه بیان کې ادعا کړې چې د دې اقدام هدف د داسې عناصرو یوه کړۍ جوړول وو چې د پاکستان پر ضد په یوه مبینه اجنډا کې د شخصي پوځ رول ترسره کړي. خواجه آصف پر خیبر پښتونخوا حکومت هم تور لګولی چې په صوبه کې د روانې ترهګرۍ پر وړاندې لازم مقاومت نه کوي او د ترهګرۍ له قربانیانو سره د یووالي له څرګندولو ډډه کوي. هغه ویلي چې د ترهګرۍ پر وړاندې روښانه دولتي دریځ او عملي اقدامات ضروري دي.