د خبرو اترو وروسته د اپوزیسیون پلاوي له محمود اڅکزي سره لیدنه

کوټه (ویب نیوز) د حکومت او اپوزیسیون ترمنځ د خبرو اترو د لومړي پړاو له پای ته رسېدو وروسته د اپوزیسیون مذاکراتي پلاوي د ملي اسمبلۍ د اپوزیسیون له مشر محمود خان اڅکزي سره د هغه په استوګنځي کې لیدنه وکړه. د سنا د اپوزیسیون مشر علامه راجا ناصر عباس په مشرۍ په دې لیدنه کې د تحریک انصاف مشر بیرسټر ګوهر، سلمان اکرم راجا، اسد قیصر، عامر ډوګر، حلیم عادل شیخ او اخونزاده حسین یوسفزي هم ګډون درلود. د اپوزیسیون مشرانو محمود اڅکزي ته له حکومت سره د ترسره شویو خبرو د پرمختګ او جزئیاتو په اړه معلومات ورکړل او د راتلونکي تګلارې او د مذاکراتي بهیر اړوند پر بېلابېلو موضوعاتو یې مشوره وکړه. د اپوزیسیون اتحاد د ویاند په وینا، په لیدنه کې د خبرو اترو د بهیر د پرمخ وړلو پر تګلارې هم بحث وشو.