د مکران ساحلي لویې لارې پر ساوړ پولیس پوسته برید، وسلوالو اور ورته واچاوه

کوټه (ویب نیوز) د مکران ساحلي لویې لارې پر ساوړ پولیس پوسته نامعلومو وسلوالو برید وکړ او پوسته یې له اور سره وسوځوله. د پولیسو د سرچینو په وینا پېښه د پنجشنبې په غرمه هغه مهال رامنځته شوه چې پر څلورو موټرسایکلونو سپرو وسلوالو ناڅاپه پر پوسته برید وکړ او کوټو ته یې اور واچاوه. سرچینې وايي چې وسلوالو د پولیسو د کارکوونکو موبایل ټیلیفونونه هم له ځان سره یووړل، خو په پېښه کې چاته مرګ ژوبله نه ده اوښتې او پر پوسته ګومارل شوي پولیس له خپلو وسلو سره خوندي پاتې شوي دي. برید کوونکي له پېښې وروسته له سیمې تښتېدلي، په داسې حال کې چې امنیتي ځواکونو د برید کوونکو د موندلو او پېښې د پلټنې لپاره عملیات پیل کړي دي.