د ولسمشر او لومړي وزیر لیدنه، له پي ټي آی سره د خبرو لپاره ګډه کمېټه جوړه شوه

اسلام‌اباد(ویب نیوز) د پاکستان ولسمشر آصف علي زرداري او لومړي وزیر شهباز شریف په ایوان صدر کې لیدنه وکړه، چې په ترڅ کې یې له پاکستان تحریک انصاف سره د خبرو لپاره ګډه کمېټه جوړه شوه. د ایوان صدر د اعلامیې له مخې په کمېټه کې د کورنیو چارو وزیر محسن نقوي، رانا ثناءالله، امیر مقام، شيري رحمان، نوید قمر او اعجاز جاکھراني شامل دي، په داسې حال کې چې د وفاقي حکومت او پیپلز ګوند ګډ پلاوی به سبا د پي ټي آی له مشرانو سره لیدنه وکړي او د روان سیاسي وضعیت په اړه به خبرې وکړي. په لیدنه کې د هېواد پر عمومي سیاسي او امنیتي وضعیت، په ځانګړي ډول په خیبر پښتونخوا کې پر امنیتي وضعیت خبرې وشوې او د ترهګرۍ پر وړاندې د ملي هوډ د لا پیاوړي کولو او د اړوندو ادارو ترمنځ د اغېزمنې همکارۍ پر اړتیا ټینګار وشو.