د ډیموکراسۍ او وطن د شهیدانو د تلینونو په مناسبت په بېلابېلو ضلعو کې د غونډو اعلان

کوټه (ویب نیوز) پښتونخوا ملي عوامي ګوند د صوبايي سیکرټریټ له خوا په خپره شوې اعلامیه کې ویل شوي چې د ۱۹۸۳ کال د اکتوبر د اوومې نېټې د ډیموکراسۍ شهیدانو اسلم اولسیار شهید، کاکا محمود شهید، داوود شهید او رمضان شهید د ۴۳م تلین او د ۱۹۹۱ کال د اکتوبر د ۱۱مې نېټې د وطن شهیدانو عبدالرحیم کلیوال شهید، صابر شاه شهید، صاحب خان شهید، باز محمد باز شهید او حبیب الرحمن شهید د تلینونو په مناسبت به په بېلابېلو ضلعو کې تعزیتی غونډې، اجتماعات او سیمینارونه جوړېږي. په دې لړ کې به د اکتوبر پر اوومه په لورالایي کې عامه غونډه او د اکتوبر پر ۱۱مه په کوټه، نواں کلی کې د سیمه‌ییز کنفرانس د پرانیستې غونډې پر مهال د ډیموکراسۍ او وطن د شهیدانو په یاد مرکزي تعزیتی اجتماع ترسره کېږي. په اعلامیه کې ویل شوي چې د ډیموکراسۍ شهیدانو د جنرال ضیا الحق د پوځي دیکتاتورۍ پر مهال د ډیموکراسۍ، د اساسي قانون د واکمنۍ او د ولس د واک حق لپاره خپلې وینې قربان کړې، په داسې حال کې چې د ۱۹۹۱ کال د اکتوبر د ۱۱مې د وطن شهیدانو د پښتونخوا وطن د ملي، سیاسي او ډیموکراتیکو حقونو د دفاع په مبارزه کې خپل ژوند له لاسه ورکړ. ګوند ویلي چې د شهیدانو قربانۍ د ملي هویت، طبیعي سرچینو، روزګار، تعلیم، روغتیا او بنسټیزو حقونو د ساتنې د دوامدارې مبارزې نښه ده. په اعلامیه کې د دیکتاتورۍ، غیر اساسي قانوني مداخلې او د ولس د واک له حق څخه د انکار مخالفت شوی او د اساسي قانون د واکمنۍ، د پارلمان د خپلواکۍ، ازادې سیاسي مبارزې، شفافو ټاکنو، د قضایه قوې د خپلواکۍ او د رایې د درناوي پر یقیني کولو ټینګار شوی دی. ګوند له ولس، سیاسي فعالانو، وکیلانو، زده کوونکو، ځوانانو او ښځو څخه غوښتنه کړې چې په یادو غونډو کې پراخ ګډون وکړي، شهیدانو ته درناوی وړاندې کړي او د اساسي، ډیموکراتیکو او ملي حقونو د مبارزې د دوام هوډ تازه کړي.