چمن (ځانګړی راپور) – هغه چې تل لوړ مقام او منزلت لري هغه درانه ښوونکي دي۔ د ښوونکو د ورځې (ټیچر ډې) په مناسبت د چمن د اقراء علمي مرکز په دواړو ادارو، د هلکانو او نجونو په څانګو کې ساده او پرتمینې غونډې ترسره شوې۔
د هلکانو په څانګه کې د مرکزي غونډې ځانګړی مېلمه، مشر خبریال او کالم لیکونکی، د اقراء علمي مرکز چمن مشر سید سردار محمد خوندئی وو۔ د غونډې پیل د لسم ټولګي زده کوونکي قدرت الله د قران پاک د تلاوت څخه وکړ، وروسته د پاکستان ملي ترانه وړاندې شوه چې د درناوي لپاره یې ټول ښوونکي او زده کوونکي ودرېدل۔
په غونډه کې زده کوونکو د “د ښوونکي شان” په موضوع هر اړخیزې ویناوې وکړې او ټولو درنو ښوونکو ته یې د عقیدت پیرزوینې وړاندې کړې۔ د سټیج سیکرټري چارې تکړه زده کوونکي سعدالله ترسره کړې۔
غونډې ته په وینا کې ځانګړي مېلمه سید سردار محمد خوندئی وویل چې د نړۍ ټول قومونه په دې خبره متفق دي چې ښوونکي د ټولنې اصلي ځواک دی او د قومونو په پرمختګ او سوکالۍ کې بنسټیز رول لوبوي۔ موږ باید د خپلو ښوونکو عزت او درناوی وکړو، ځکه د یوې علمي او هنري ټولنې د جوړولو لپاره ښوونکی یوازینۍ سرچینه ده۔
په پای کې ځانګړي مېلمه په غوره ویناوو کونکو زده کوونکو کې نغدي انعامونه وویشل۔
په ورته وخت کې د اقراء علمي مرکز د نجونو په څانګه کې هم یوه پرتمینه غونډه جوړه شوې وه، چې په کې زده کوونکو د دې ورځې په مناسبت ویناوې وکړې او رنګارنګ ملي نغمې یې وړاندې کړې۔
د دواړو ادارو په ټولو ټولګیو کې د کیک پرې کولو دستورې هم ترسره شوې، د هلکانو په څانګه کې د کیک پرې کولو په ټولو مراسمو کې مشر خبریال سید سردار محمد خوندئی په ځانګړي توګه ګډون وکړ۔
د اقراء علمي مرکز چمن لخوا په خپره شوې اعلامیه کې د ښوونکو د ورځې په مناسبت ټولو درنو ښوونکو ته د عقیدت پیرزوینې وړاندې شوې ده۔
