د بلوچستان د بلدیاتي ادارو درې میاشتې بند غیر معاشي فنډونه دې بېرته فعال شي: د لوکل کونسل فورم

ژوب (وېب نیوز) د بلوچستان د ټولو لوکل کونسلونو فورم ویلي چې د صوبې بلدیاتي ادارې له تېرو درېیو میاشتو راهیسې له غیر معاشي بودجې بې برخې دي او کارکوونکي له سختو مالي ستونزو سره مخ دي. فورم غوښتنه کړې چې بند شوي فنډونه دې ژر تر ژره بېرته فعال شي. په بیان کې ویل شوي چې د بلوچستان د اعلیٰ وزیر له خوا د ۲۰۲۷ کال په فبرورۍ کې د بلدیاتي ټاکنو د ترسره کولو اعلان شوی، خو له دې سره باید اوسنیو بلدیاتي ادارو ته مالي سرچینې او عملي واکونه هم ورکړل شي. فورم ویلي چې شاوخوا یو کال مخکې د بلدیاتي استازو، مشرانو او مرستیالانو لپاره د معاشونو او امتیازاتو د برابرولو اعلان شوی و، خو تر اوسه پرې عمل نه دی شوی. فورم ټینګار کړی چې د فعال بلدیاتي نظام لپاره فنډونه، واکونه او د ټاکل شوو استازو قانوني حقونه ضروري دي.