د بلوچستان پولیسو لومړنۍ دنده د خلکو د سر او مال ساتنه ده، آی جي محمد طاهر

کوټه (وېب نیوز): د بلوچستان د پولیسو آی جي محمد طاهر ویلي چې د خلکو د سر او مال ساتنه او هغوی ته د سوله ییز او له جرمونو پاک چاپېریال برابرول د بلوچستان پولیسو لومړنۍ دنده ده او پولیس افسران او سرتېري باید خپلې دندې په بشپړ مسؤولیت ترسره کړي. نوموړي د قلعه سیف الله د سفر پر مهال د پولیسو له افسرانو او سرتېرو سره په خبرو کې دغه څرګندونې وکړې. د ژوب ډی آی جي نوموړي ته د سیمې د امنیت او د امن و امان په اړه تفصیلي معلومات ورکړل او آی جي د خلکو د ساتنې، د امن و امان د ټینګښت او د جرمونو د مخنیوي لپاره د اغېزمنو اقداماتو د دوام لارښوونه وکړه. قلعه سیف الله ته د رسېدو پر مهال پولیسو سلامي ورکړه، آی جي د شهیدانو یادګار ته لاړ او شهیدانو ته یې درناوی وړاندې کړ. وروسته یې د بوستان پولیسو تاڼې معاینه وکړه، له پولیسو سره یې ولیدل او د تاڼې فعالیتونه یې وارزول، په داسې حال کې چې د غوره کارکردګۍ لرونکو پولیسو ته یې ستاینلیکونه هم ورکړل.