د ترهګرو په روزنیز مرکزونو کې اسرائیلیان هم د ټکنالوژۍ روزنه ورکوي، رانا ثناء الله

اسلام اباد (ویب نیوز) د وزیراعظم د سیاسي چارو سلاکار رانا ثناء الله ادعا کړې چې د ترهګرو په روزنیزو مرکزونو کې د اسرائیل خلک هم ورځي او هغوی ته د ټکنالوژۍ روزنه ورکوي. نوموړي په یوه ټلویزیوني پروګرام کې د خبرو پر مهال وویل چې د ترهګرۍ پر وړاندې جګړه کې د وفاقي حکومت پر پالیسۍ عمل کول د صوبايي حکومت اساسي قانوني مسؤلیت دی او د ترهګرۍ پر وړاندې د پالیسۍ جوړولو واک وفاقي حکومت لري. د هغه په وینا، قطر، سعودي عربستان، ترکیې او چین هم له طالبانو سره مذاکرات کړي، خو کومه پایله یې نه ده ترلاسه کړې، په داسې حال کې چې د ترهګرۍ په پېښو کې ککړ کسان له افغانستان څخه روزنه ترلاسه کوي او له هماغه ځایه کنټرولېږي. رانا ثناء الله وویل چې پخواني حکومت د ترهګرو د عمومي بښنې او بېرته راوستلو پالیسي غوره کړې وه، چې د پخوانۍ فاټا خلکو یې مخالفت کړی و. هغه وویل چې پوځي او سیاسي مشرتابه پرېکړه کړې چې د ترهګرۍ پر وړاندې جګړه تر وروستۍ پایلې ورسوي او صوبايي حکومت باید په دې پالیسي کې خپل رول ترسره کړي. نوموړي ادعا وکړه چې د ترهګرو له خوا کارول کېدونکي ډرونونه افغان طالبانو تر دې مخکې نه وو کارولي. رانا ثناء الله زیاته کړه چې له تحریک انصاف سره په مذاکراتو کې پر سیاسي موضوعاتو، د تحریک انصاف د بنسټګر پر روغتیا او له هغه سره د لیدنو په ګډون پر ګڼو مواردو موافقه شوې وه، خو د ترهګرۍ پر وړاندې د پالیسۍ د جوړولو لپاره د اتفاق شرط ایښودل له اساسي قانون او قانون سره سمون نه لري. هغه د خیبر پښتونخوا د وزیراعلیٰ سهیل افریدي د لانګ مارچ په اړه وویل چې له لکي مروت څخه په پیل شوي مارچ کې له درېیو تر څلورو زرو کسانو ګډون کړی و، چې د هغه په وینا له دې څخه د مارچ د ولسي ملاتړ اندازه اټکل کېدای شي.