د ترهګرۍ ضد محکمې د عمران خان د وړاندې کولو حکم، مراد سعید او شبلي فراز اشتهاري وبلل شول

اسلام‌اباد (ویب نیوز) د اسلام‌اباد د ترهګرۍ ضد محکمې د جوډیشل کمپلېکس د برید په قضیه کې د پي ټي آی د بنسټګر عمران خان د راتلونکې اورېدنې پر مهال محکمې ته د وړاندې کولو حکم کړی دی. د ترهګرۍ ضد محکمې قاضي طاهر عباس سپرا د قضیې د اورېدنې پر مهال حکم وکړ چې عمران خان دې په فزیکي توګه یا د ویډیو لینک له لارې محکمې ته وړاندې شي. محکمې فرخ حبیب، حماد اظهر، مراد سعید او شبلي فراز اشتهاري وبلل او د هغوی د جایدادونو د معلوماتو غوښتنه یې هم وکړه. محکمې د پنجاب اسمبلۍ د پخواني مرستیال سپیکر واثق قیوم او حسان نیازي د نه ضمانت کېدونکو نیولو حکمونه هم صادر کړل. د جوډیشل کمپلېکس د برید او ورانکارۍ قضیه په رمنا پولیس تاڼه کې د عمران خان په ګډون د پي ټي آی د ۲۱ مشرانو او ۲۵۰ کارکوونکو پر ضد درج شوې ده، چې پکې د ترهګرۍ، په دولتي چارو کې د مداخلې او له دولتي کارکوونکو سره د مقاومت مادې شاملې دي.