د حکومت او اپوزیسیون مذاکرات له موافقې سره سره بې پایلې پای ته ورسېدل، دواړو لورو یو بل ملامت کړ

کوټه (ویب نیوز) د حکومت او اپوزیسیون ترمنځ مذاکرات، سره له دې چې پر ګڼو مواردو هوکړه شوې وه او د تړون مسوده هم چمتو شوې وه، بې پایلې پای ته ورسېدل او دواړو لورو د مذاکراتو د ناکامۍ پړه پر یو بل واچوله. د پاکستان مسلم لیګ (ن) مرکزي مرستیال مشر سردار یعقوب خان ناصر، صوبايي جنرل سیکرټري جمال شاه کاکړ، د اېکسایز پارلماني سیکرټري حاجي محمد خان لهړي او د پاکستان پیپلز ګوند بلوچستان صوبايي مشر سناتور سردار عمر ګورګېج وویل چې تحریک انصاف په پیل کې د مذاکراتو لپاره سنجیده وه، خو وروسته یې خپل دریځ بدل کړ او مذاکرات یې د ناکامولو هڅه وکړه. حکومتي غړو وویل چې هېواد دا مهال د ترهګرۍ له جدي ستونزې سره مخ دی او سیاسي قوتونه باید د اختلاف پر ځای د ترهګرۍ د ختمولو لپاره ګډ کردار ترسره کړي. هغوی وویل چې د وزیراعظم شهباز شریف له خوا اپوزیسیون مشر ته د لیک له استولو وروسته مذاکرات پیل شول، پر ګڼو مواردو هوکړه وشوه او مسوده هم چمتو شوه، خو وروسته د تحریک انصاف په دریځ کې بدلون راغی. بل لوري ته د پښتونخوا ملي عوامي ګوند مرکزي جنرل سیکرټري عبدالرحیم زیارتوال، صوبايي مشر عبدالقاهر ودان، د تحریک انصاف بلوچستان مشر داود شاه کاکړ او مرکزي مشر نور خان ناصر وویل چې اپوزیسیون له لومړۍ ورځې د مذاکراتو له لارې د خپلو غوښتنو د حل لپاره سنجیده و، خو د حکومتي پلاوي چلند آمرانه او له فشار څخه ډک و. اپوزیسیون مشرانو وویل چې د مذاکراتو پر مهال په خیبر پښتونخوا کې د بېړني حالت او ګورنر راج یادونه کول له بلیک مېلنګ پرته بل څه نه وو او د تحریک انصاف له بنسټګر سره د مشورې غوښتنه هم ونه منل شوه. هغوی وویل چې د مذاکراتو له ناکامۍ وروسته د سوله‌ییز او ډیموکراتیک احتجاج پرته بله لار نه لري او د خپلو غوښتنو لپاره به پراخ احتجاج وکړي.