د ټرانسپورټي برخې د پیاوړتیا لپاره جدي اقدامات اړین دي، ټرانسپورټران

کوټه (وېب نیوز): د آل بلوچستان ټرانسپورټرانو د اقدام کمېټې مشر حاجي حبیب الله خان بادیزي او عمومي منشي میر اکبر لهړي ویلي چې د ټرانسپورټ برخه د زیاتېدونکو لګښتونو، مالیاتو، ټال ټکس او نورو ستونزو له امله له سخت مالي فشار سره مخ ده او د کاروبار دوام ستونزمن شوی دی. دوی وویل چې د ډیزلو، موټرو د پرزو، ټایرونو، ترمیم او نورو لګښتونو زیاتوالي ټرانسپورټران له جدي مالي ستونزو سره مخ کړي، خو له بلې خوا د مسافرو د اقتصادي ستونزو له امله د کرایو زیاتول هم اسانه نه دي. هغوی له حکومت څخه وغوښتل چې د ټرانسپورټرانو له استازو سره خبرې وکړي، جامع پالیسي جوړه کړي، غیر ضروري مالي بار کم کړي، پر مالیاتو او نورو لګښتونو بیا کتنه وکړي او د دې برخې ستونزې په عملي توګه حل کړي، ځکه له ټرانسپورټ سره د زرګونو کورنیو روزګار تړلی او خلکو ته د خوندي، هوسا او پر وخت سفري اسانتیاوو برابرول د دې برخې له ثبات سره تړاو لري.