لیکنه: سید انور شاه
پاکستان په بېلابېلو دورو کې له امریکا سره همکاري کړې ده، خو د دې همکارۍ پایلې تل د پاکستان له ګټو او تمو سره سمې نه دي ختلې. د افغانستان په جګړه او د ترهګرۍ پر ضد عملیاتو کې د پاکستان د ګډون له امله هېواد ته ځاني او مالي زیانونه واوښتل، ناامني زیاته شوه او اقتصاد له ګڼو ستونزو سره مخ شو. دغو تجربو دا درس راکړی چې له نړیوالو قدرتونو سره په اړیکو کې باید د احساساتو او لنډمهاله امتیازاتو پر ځای ملي ګټو ته لومړیتوب ورکړل شي. پاکستان باید له هر ډول نړیوالې همکارۍ مخکې د هغې احتمالي پایلې، پر سیمهییز امنیت اغېزې او راتلونکي خطرونه په جدي توګه وارزوي.
د هغو وروستیو ادعاوو په اړه چې ګواکې امریکايي سمندري ځواک ته اجازه ورکړل شوې چې د پاکستان خاوره د ایران پر ضد وکاروي، د پاکستان د اطلاعاتو او خپرونو وزارت دغه ادعاوې بېبنسټه او ګمراه کوونکې بللې دي. خو په اوسني وضعیت کې یوازې تردید بسنه نه کوي؛ حکومت باید روښانه او څرګند دیپلوماتیک دریځ خپل کړي او دا خبره واضح کړي چې د پاکستان خاوره، هوايي حریم او سمندري حدود د بل هېواد پر ضد د پوځي عملیاتو لپاره یوازې د ملي امنیت او هېواد د ګټو له اصولو سره سم ارزول کېدای شي. د یوې ناتایید شوې ادعا حقیقت ګڼل سم کار نه دی، خو په داسې حساسو موضوعاتو کې د حکومتي تګلارې وضاحت او روڼتیا هم اړینه ده، څو اوازې او ناسم پوهاوی له منځه ولاړ شي.
پاکستان باید د تېر وخت له تېروتنو څخه په زده کړه، له امریکا او نورو سترو قدرتونو سره خپلې اړیکې د برابرۍ، متقابل درناوي او روښانه شرطونو پر بنسټ جوړې کړي. ایران زموږ ګاونډی هېواد دی او له هغه سره د تاوتریخوالي اغېزې د سرحدي سوداګرۍ، اقتصاد او سیمهییزې سولې پر وضعیت هم پرېوتلای شي. پاکستان باید د نورو هېوادونو په شخړو کې د ښکېلتیا پر ځای د ډیپلوماسۍ، خبرو اترو او سولهییز حل ملاتړ وکړي. ملي وقار دا غوښتنه کوي چې هېواد خپلې بهرنۍ پالیسۍ په خپله وټاکي، د هېڅ ځواک تر فشار لاندې خپلې ملي ګټې له پامه ونه غورځوي او هر ډول همکاري د پارلماني څارنې او ملي امنیت له اصولو سره مشروطه کړي. دوستي او همکاري پر خپل ځای، خو د پاکستان خپلواکي او د خلکو ګټې باید په هر حالت کې لومړیتوب ولري.
