ډیجیټلي خدمات د عصري حکومتولۍ او د ولسي اسانتیاوو د اغېزمنې رسونې مهمه وسیله ده، ډاکټر ربابه بلېدي

کوټه (وېب نیوز) د بلوچستان د اعلی وزیر د ښځو د پرمختګ مشاورې ډاکټر ربابه خان بلېدي ویلي، ډیجیټلي خدمات د دولتي چارو د روڼتیا، چټکتیا او ځواب ویلو لپاره مهم دي او د خلکو د دفتري ستونزو په کمولو کې مرسته کولای شي. د بلوچستان سول سروسز اکېډمۍ په پرانیستونکې روزنیزه غونډه کې هغې وویل، ډیجیټلي حکومتولي یوازې د ټکنالوژۍ کارول نه دي، بلکې د دولتي نظام اصلاح او د خلکو د اړتیاوو له مخې د خدماتو برابرول دي. هغې د دولتي افسرانو لپاره د نوې ټکنالوژۍ، مصنوعي ځیرکتیا او ډیجیټلي اداري مهارتونو د زده کړې پر اړتیا ټینګار وکړ. د هغې په وینا، د ډیجیټلي اسانتیاوو په پلان جوړونه کې باید د ښځو، په ځانګړي ډول د لرې پرتو سیمو د ښځو اړتیاوې په پام کې ونیول شي. د یادونې وړ ده چې اکېډمۍ د اکانټېبیلټي لېب پاکستان په همکارۍ د ۳۰ دولتي افسرانو لپاره د ډیجیټلي حکومتولۍ درې ورځنی روزنیز کورس پیل کړی دی.