ایران کې د ناقانونه افغان وګړو پر ضد د عملیاتو چټکتیا، سلګونه زره له هېواده ایستل شوي

اسلام‌اباد (ویب نیوز) په ایران کې د اسنادو پرته مېشتو افغان وګړو پر ضد عملیات چټک شوي دي. د کډوالو لپاره د ملګرو ملتونو د عالي کمېشنرۍ (یو این ایچ سي آر) د راپور له مخې، د روان کال له پیل راهیسې له ایران څخه تر ۴۳۹ زرو ډېر افغان وګړي ایستل شوي چې ۸۶ سلنه یې په بشپړه توګه غیر ثبت شوي او د سفر یا استوګنې قانوني اسناد یې نه لرل. د راپور له مخې، د کار موندلو لپاره د سختو او غیرقانوني لارو له لارې د پولې د اوښتو پر مهال سلګونه افغان ځوانان خپل ژوند له لاسه ورکړی، په داسې حال کې چې د افغان وګړو په دومره لویه کچه بېرته ستنېدو په افغانستان کې د استوګنې، کار، روغتیا او زده کړو پر اسانتیاوو فشار زیات کړی دی. شنونکي وايي، د افغان وګړو پراخه ایستل په سیمه کې د ناقانونه تګ راتګ او احتمالي امنیتي ګواښونو په اړه د زیاتېدونکو اندېښنو څرګندونه کوي.