په کوټه او د بلوچستان په بېلابېلو سیمو کې د پښتون کلتور ورځ په جوش او جذبې ولمانځل شوه

کوټه (ویب نیوز) د نړۍ د نورو برخو ترڅنګ په پاکستان او د بلوچستان په بېلابېلو سیمو کې هم د پښتون کلتور نړیواله ورځ په ملي جوش او دودیزو رنګونو ولمانځل شوه. په کوټه او نورو سیمو کې د سیاسي ګوندونو، مدني ټولنو او بېلابېلو قشرونو له خوا غونډې او پروګرامونه جوړ شول، چې ځوانانو پکې دودیزې جامې اغوستې وې او د ډولونو په غږ یې اتڼونه ترسره کړل. په پروګرامونو کې د پښتنو د کلتور، تمدن، ژوند طریقې او دودیزو توکو نندارتونونه جوړ شوي وو، همدارنګه د پښتو ژبې د ودې او په تعلیمي، دولتي او عدلي برخو کې د هغې د پراختیا پر اهمیت خبرې وشوې. په دودیزو لوبو کې ملي اتڼ، غېږ نیونه، ینډه، خوسی او کلیوالي بانډار شامل وو، او د ژبې او کلتور د ساتنې لپاره پر ګډو هڅو او د مورنۍ ژبې پر پراختیا ټینګار وشو.