د افغان ډرون بریدونو په ځواب کې پر افغانستان د ۱۰ ځایونو د برید ادعا: عطا تارړ

اسلام‌اباد (ویب نیوز) د پاکستان د اطلاعاتو او خپرونو وفاقي وزیر عطا الله تارړ ویلي چې د سپټمبر پر ۲۳مه له افغان خاورې څخه د پاکستان قلمرو ته د ننوتلو هڅه کوونکي ډرونونه د پاکستان د هوايي دفاع سیستم پر وخت کشف او تعقیب کړي او له ټاکلي هدف ته تر رسېدو مخکې یې له منځه وړي دي. د نوموړي په وینا، پاکستان د دغو ډرون بریدونو په ځواب کې د افغانستان دننه پر ۱۰ هغو ځایونو هوايي او ډرون بریدونه کړي چې د ده په خبره د ډرونونو د توغولو او ساتلو لپاره کارېدل. عطا تارړ د افغان ډرون عملیات د پاکستان د ملي حاکمیت او ځمکنۍ بشپړتیا ښکاره سرغړونه وبلله او ویې ویل چې د پاکستان اقدام د خپل اساسي قانون او نړیوال قانون له مخې د دفاع د حق په چوکاټ کې شوی او بریدونه یوازې پر اړوندو پوځي هدفونو محدود وو. هغه وویل چې پاکستان له اوږدې مودې راهیسې د افغان طالبانو له حکومت څخه د افغان خاورې پر سر د ترهګرو د خوندي پټنځایونو او د هغوی د ملاتړ کوونکو شبکو پر وړاندې د اغېزمنو اقداماتو غوښتنه کړې ده. د اطلاعاتو وزیر خبرداری ورکړ چې پاکستان به د خپلې خاورې پر وړاندې هېڅ ډول برید ونه مني او د راتلونکو پاروونکو اقداماتو ځواب به ورکړي. نوموړي په ورته وخت کې وویل چې پاکستان په سیمه کې د شخړې د پراخېدو غوښتونکی نه دی او د سیمه‌ییزې سولې، خبرو او مثبتو اړیکو له لارې د ستونزو د حل پر ژمنتیا ولاړ دی.