د نورستان د ادعا شوي تاوتریخوالي له پاکستان سره تړلو تورونه بې بنسټه دي: د اطلاعاتو وزارت

کوټه (وېب نيوز)د پاکستان د اطلاعاتو او خپرونو وزارت د حقیقت موندنې په ترڅ کې د افغان طالبانو د حکومت په نورستان کې ادعا شوی تاوتریخوالی له پاکستان سره د تړلو تورونه بې بنسټه بللي دي. د اطلاعاتو وزارت په یوه خپاره کړي بیان کې ویلي چې پاکستان د افغان امنیتي ځواکونو او استخباراتي ادارو له خوا لګېدلي تورونه ردوي او په افغانستان کې په داخلي نښتو کې د پاکستان د ښکېلتیا ادعاوې بې بنسټه دي. په بیان کې د پخوانیو افغان امنیتي چارواکو د استخدام او روزنې او همدارنګه د داعش یا کومې بلې ترهګرې ډلې ته د اسانتیا برابرولو تورونه هم رد شوي دي. د اطلاعاتو وزارت په وینا، د پاکستان پر ضد د لګول شوو تورونو لپاره هېڅ شواهد نه دي وړاندې شوي او نه هم د کوم کس پېژندنه، اسناد، د اړیکو معلومات یا عدلي طب شواهد وړاندې شوي دي.