په زیارت کې نامعلومو کسانو شاوخوا ۷۰ د مڼو مېوه لرونکي ونې پرې کړې

زیارت (ویب نیوز) د زیارت د روست کچھ په سیمه کې نامعلومو کسانو د شپې له تیارې څخه په استفادې په یوه باغ کې شاوخوا ۷۰ د مڼو مېوه لرونکي ونې پرې کړې دي. د ځايي خلکو په وینا، نامعلوم کسان د شپې باغ ته ننوتل، ونې یې پرې کړې او له سیمې وتښتېدل، چې له امله یې د باغ مالک ته مالي زیان اوښتی دی. د پېښې له امله په سیمه کې اندېښنې زیاتې شوې دي. د باغ مالکانو او ځايي خلکو له اړوندو چارواکو غوښتنه کړې چې د پېښې شفافه پلټنه وکړي او د ونو پرې کوونکي کسان وپېژني او د قانون له مخې سزا ورکړي. په زیارت کې د مڼو باغونه د سیمې د کرنې او اقتصاد مهمه برخه ده، خو په وروستیو کلونو کې د اوبو کمښت او د تولید د لګښتونو زیاتوالی د باغ لرونکو ستونزې زیاتې کړې دي.