د بندونو په جوړولو به شاړې سیمې په کرنیزو ځمکو بدلې شي، افغان قومي غورځنګ

کوټه (ویب نیوز) افغان قومي غورځنګ د بندونو د جوړولو لپاره د کروندګرو د روان احتجاج ملاتړ کړی او ویلي یې دي چې د بندونو په جوړولو سره شاړې سیمې په کرنیزو ځمکو بدلېدای شي او د اوبو زېرمې رامنځته کېدای شي، خو د خراب کیفیت جوړښت، غیرمعیاري موادو او د ادعا شوې درغلۍ له امله دغه پروژې د خلکو لپاره د ستونزو لامل کېدای شي. غورځنګ د پخوانیو بندونو د ساتنې او ترمیم، د ادعا شوو مالي درغلیو د شفافې پلټنې او د نویو بندونو لپاره د مناسبو بودیجو د ځانګړې کولو غوښتنه کړې ده. افغان قومي غورځنګ ټینګار کړی چې نوي بندونه دې د خټو پر ځای په پیاوړي کانکریټ جوړ شي او د جوړولو پر مهال دې د کیفیت ازموینه، منظمه څارنه او د خوندیتوب تدابیر یقیني کړل شي.