په کوټه کې د مېټروپولیټن کارپوریشن له خوا د مېوو او سبزیو ډکې ریړۍ ونیول شوې

کوټه (ویب نیوز) په کوټه ښار کې د مېټروپولیټن کارپوریشن له خوا د تجاوزاتو پر ضد د عملیاتو پر مهال په مېوو او سبزیو بار لسګونه ریړۍ نیول شوې دي. اغېزمنو ریړۍ چلوونکو له ادارې غوښتنه کړې چې د روزګار لپاره ورته منظم بدیل ځایونه ورکړل شي، څو خپل حلال روزګار ته دوام ورکړي. د هغوی په وینا دوی د تجاوزاتو پر ضد د اقداماتو اصولي مخالفت نه کوي، خو د بې وزلو مزدورانو اقتصادي ستونزې هم باید په پام کې ونیول شي. ریړۍ چلوونکو تور لګولی چې د عملیاتو پر مهال له ځینو کسانو څخه ریړۍ او سامان اخیستل شوي، خو رسمي چالان یا رسید نه دی ورکړل شوی او د ریړیو د بېرته ترلاسه کولو پر مهال پکې موجودې مېوې او سبزیانې نه وي، چې له امله یې دوی ته مالي زیان رسېږي. دوی غوښتنه کړې چې د نیول کېدونکو ریړیو او سامانونو بشپړ ریکارډ دې جوړ شي، د عملیاتو پر مهال دې رسید یا چالان ورکول یقیني شي او د ریړۍ چلوونکو لپاره دې مناسب ځایونه وټاکل شي، څو له یوې خوا د ښار د تجاوزاتو ستونزه هواره او له بلې خوا د بې وزلو کارګرانو روزګار خوندي پاتې شي.