د حکومت او اپوزیسیون د خبرو لومړی پړاو پای ته ورسېد، دویم پړاو سبا کېږي

کوټه (ویب نیوز) د حکومت او اپوزیسیون ترمنځ د خبرو لومړی پړاو پای ته ورسېد او په خپره شوې اعلامیه کې ویل شوي چې دواړو خواوو د هېواد د سیاسي وضعیت په ګډون پر بېلابېلو موضوعاتو تفصیلي او په زغم سره خبرې وکړې او یو بل یې له خپلو دریځونو خبر کړل، په داسې حال کې چې د خبرو دویم پړاو به سبا د ماسپښین په دوو بجو د ملي اسمبلۍ د سپیکر په خونه کې ترسره شي. په خبرو کې د حکومت له لوري رانا ثناءالله، وفاقي وزیران محسن نقوي، امیر مقام، طلال چوهدري، طارق فضل چوهدري، سناتوره شیري رحمان، نوید قمر او اعجاز حسین جاکهراني او د اپوزیسیون له لوري بیرسټر ګوهر، علامه راجا ناصر عباس، عامر ډوګر، اسد قیصر، سلمان اکرم راجا او حلیم عادل شیخ ګډون کړی و. په اعلامیه کې ویل شوي چې د مسلم لیګ (ن) او پیپلزپارټۍ غړو پر دې ټینګار وکړ چې ملي ستونزې باید د خبرو له لارې حل شي، په داسې حال کې چې د ملي اسمبلۍ سپیکر سردار ایاز صادق د خبرو په ترسره کولو کې مهم رول درلود. د سنا د اپوزیسیون مشر علامه راجا ناصر عباس وویل چې په خبرو کې تریخوالی نه و او پر ټولو موضوعاتو په درناوي او څرګند ډول بحث وشو، خو د بېړني حالت او ګورنر راج د موضوع په اړه یې ګیله څرګنده کړه. د پیپلزپارټۍ مشرې سناتورې شیري رحمان وویل چې خبرې به اوږدې نه وي او سبا په غونډه کې چې کومه وروستۍ خبره کېږي، هغه به د رسنیو له لارې له خلکو سره شریکه شي، خو تحریک انصاف باید لانګ مارچ بې له کوم شرطه پای ته ورسوي.