شیري رحمان: تحریک انصاف باید لانګ مارچ بې له کوم شرطه پای ته ورسوي

کوټه (ویب نیوز) د پاکستان پیپلزپارټۍ مشرې سناتورې شیري رحمان ویلي چې د حکومت او تحریک انصاف ترمنځ خبرې به اوږدې نه وي او تحریک انصاف باید لانګ مارچ بې له کوم شرطه پای ته ورسوي. هغې له رسنیو سره په خبرو کې وویل چې تحریک انصاف د ځواب لپاره وخت غوښتی او سبا په خبرو کې چې هره وروستۍ خبره پرېکړه شي، هغه به د رسنیو له لارې له ټولو سره شریکه کړي، او هڅه به دا وي چې د خبرو راتلونکی پړاو پای ته ورسېږي. شیري رحمان وویل چې په خبرو کې دواړو خواوو هوکړه کړې چې یو بل ته د مشورې لپاره وخت ورکړي او باید د بې باورۍ څرګندونه ونه شي، خو د پوځ او پولیسو د سرتېرو په ګډون د ولس د وژنو له امله د ترهګرۍ موضوع د پیپلزپارټۍ لپاره سره کرښه ده.