له وړتیا او میرټ پرته پرمختیايي پروژې بشپړېدای نه شي، زمرک اڅکزی

کوټه (ویب نیوز) د عوامي نېشنل ګوند پارلماني مشر انجینر زمرک خان اڅکزي ویلي چې په پرمختیايي پروژو کې د وړتیا او میرټ یقیني کول اړین دي، ځکه له میرټ پرته هېڅ پروژه په اغېزمن ډول بشپړېدای نه شي. نوموړي د آل بلوچستان ګورنمنټ کنټرکټرز ایسوسی اېشن د لوړې په مراسمو کې د وینا پر مهال د ټولنې له چارواکو څخه په مراسمو کې د ګډون بلنې له امله مننه وکړه او ویې ویل چې پاکستان یو جمهوري هېواد دی او هر وګړی حق لري چې له کومې سیاسي ډلې سره تړاو ولري. هغه وویل چې ټولې سیاسي ډلې غواړي د ولس او بلوچستان ستونزې حل شي، خو اوسني حالات د پرمختګ لپاره مناسب نه دي. انجینر زمرک اڅکزي له قراردادیانو وغوښتل چې یوازې خپل کاروبار او عاید ته محدود نه شي، بلکې د بلوچستان د پرمختګ او سوکالۍ لپاره هم خپل رول ولوبوي. هغه له حکومته وغوښتل چې د قراردادیانو ستونزې ژر تر ژره حل کړي، څو پرمختیايي چارې په اغېزمن ډول پر مخ ولاړې شي. نوموړي وویل چې بلوچستان له معدني او طبیعي زیرمو څخه بډای دی او د دغو سرچینو په اغېزمن استعمال سره د بلوچستان ترڅنګ د ټول هېواد اقتصاد هم پیاوړی کېدای شي. انجینر زمرک اڅکزي د صوبې د امنیتي وضعیت په اړه اندېښنه څرګنده کړه او ویې ویل چې له یوې ولسوالۍ څخه بلې ولسوالۍ ته سفر هم ستونزمن شوی، د قراردادیانو ماشینري سوځول کېږي او د زیانمنو کسانو د ستونزو د حل لپاره اغېزمن نظام نه تر سترګو کېږي. هغه وویل چې د ټولو پولو تړل کېدو او د کار محدودو فرصتونو د ولس، په ځانګړې توګه د ځوانانو ستونزې زیاتې کړې دي. نوموړي ټینګار وکړ چې په بلوچستان کې د امن، روزګار، میرټ او پرمختیايي بهیر لپاره حکومت، سیاسي ګوندونه، سوداګریز قشر او ولس باید په ګډه خپل رول ترسره کړي.