د سرکاري دندو سیاسي وېش نه منو، پروفیسور حلیم صادق

کوټه (ویب نیوز) د عوام پاکستان ګوند د بلوچستان صوبايي عمومي منشي پروفیسور ډاکټر حلیم صادق په بلوچستان کې د سرکاري دندو د ادعا شوي سیاسي وېش او ګمارنو په اړه اندېښنه څرګنده کړې او ویلي یې دي چې دا ډول اقدامات د صوبې په تعلیم یافته او وړ ځوانانو کې ناهیلي او بې باوري زیاتوي. هغه تور ولګاوه چې ځینې وزیران، سلاکاران او د صوبايي اسمبلۍ غړي خپلو خوښو کسانو او د ګوند عهده دارانو ته د سرکاري دندو د تقرر حکمونه وېشي چې د میرټ او شفافیت پر دعوو پوښتنې راپورته کوي. هغه وویل که سرکاري دندې د سیاسي تړاو پر بنسټ ورکول کېږي، نو د لوړو زده کړو لرونکو بې روزګاره ځوانانو لپاره به مساوي فرصتونه چېرې پاتې شي. پروفیسور حلیم صادق له وزیراعلیٰ بلوچستان میر سرفراز بګټي څخه غوښتنه وکړه چې په سرکاري دندو کې میرټ، شفافیت او د قانون واکمني یقیني کړي او ځوانانو ته دې د هغوی د وړتیا له مخې د روزګار مساوي فرصتونه برابر کړي.