د پي ټي آی له بنسټګر پرته به هېڅ پرېکړه نه کوو، سلمان اکرم راجا

اسلام‌آباد (ویب نیوز) د پاکستان تحریک انصاف عمومي منشي سلمان اکرم راجا ویلي چې د تحریک انصاف له بنسټګر پرته به هېڅ پرېکړه ونه کړي. نوموړي په اسلام‌آباد کې د تحریک انصاف له وکیلانو سره په ګډه خبري کنفرانس کې وویل چې د حکومت او تحریک انصاف ترمنځ د مذاکراتو دوه پړاوونه ترسره شول، خو بې له کومې پایلې پای ته ورسېدل. د هغه په وینا د تحریک انصاف دوه مهمې غوښتنې وې چې یوه یې له بنسټګر سره ملاقات او بله یې په خیبر پښتونخوا کې د ترهګرۍ د ختمولو لپاره د سیاسي ګوندونو د جرګې وړاندیزونو ته پام کول وو. سلمان اکرم راجا وویل چې د مذاکراتو پر مهال په ډېرو مسئلو د هوکړې تر پولې رسېدلي وو، خو د بنسټګر د شخصي ډاکټرانو د لاسرسي او په خیبر پښتونخوا کې د ترهګرۍ پر موضوع هوکړه ونه شوه. هغه وویل چې د سولې د جرګې پر اسنادو د مسلم لیګ ن، عوامي نیشنل ګوند او نورو ګوندونو د استازو لاسلیکونه موجود دي او د دغو وړاندیزونو ردول به مناسب نه وي. نوموړي وویل چې د اوږده لاریون مشري د خیبر پښتونخوا وزیراعلی سهیل افریدي کوي او تحریک انصاف به یې ملاتړ کوي، خو د صوبې په اړه ټولې پرېکړې باید په مشوره ترسره شي. بل لور ته د تحریک انصاف د بنسټګر وکیل بیرسټر سلمان صفدر په اسلام‌آباد عالي محکمه کې له رسنیو سره په خبرو کې وویل چې د سترې محکمې او اسلام‌آباد عالي محکمې پر ګڼو پرېکړو عمل نه دی شوی او په اوسنیو شرایطو کې اسلام‌آباد عالي محکمې ته رسېدل هم ستونزمن شوي دي.