د خوشحال خان کاکړ د ژوب سفر، په بېلابېلو سیمو کې تود هرکلی

ژوب (ویب نیوز) د پښتونخوا ملي عوامي ګوند د مشر او د قومي اسمبلۍ غړي خوشحال خان کاکړ د ژوب د سفر پر مهال په بېلابېلو سیمو کې تود هرکلی وشو. ولس د موټرو او موټرسایکلونو د اوږدو کاروانونو په بڼه نوموړی تر غونډو پورې بدرګه کړ او په بېلابېلو ځایونو کې پرې د ګلونو پاڼې وشيندل شوې. ماشومانو خوشحال خان کاکړ ته ګلدستې وړاندې کړې، په داسې حال کې چې قومي مشرانو، علماوو، ځوانانو او سیاسي فعالانو هم د هغه هرکلی وکړ. د ګوند د مشرانو له ډلې سینئر مرستیال مشر او صوبايي سینئر نائب رئیس عبدالقیوم ایډووکېټ او نور مشران هم ورسره وو. د سفر پر مهال د بېلابېلو سیمو ګڼو کسانو له پښتونخوا ملي عوامي ګوند سره د یوځای کېدو اعلان وکړ او د پښتونخوا وطن د ولس د حقونو لپاره یې د سیاسي مبارزې د دوام هوډ څرګند کړ. د ګوند په وینا، د سفر پر مهال د ځوانانو او سیاسي فعالانو ترمنځ د پام وړ جوش او لېوالتیا لیدل کېده.