د ترهګرۍ پر مسئله مذاکرات ناکام شوي، د ملاقات پر موضوع نه: عطا تارړ

اسلام‌اباد (ویب نیوز) د اطلاعاتو وفاقي وزیر عطا تارړ ویلي چې د حکومت او پي ټي آی ترمنځ مذاکرات د پي ټي آی له بنسټګر عمران خان سره د ملاقات پر موضوع نه دي ناکام شوي، بلکې اصلي اختلاف د ترهګرۍ پر مسئله رامنځته شوی دی. عطا تارړ د سما ټي وي په یوه خپرونه کې د خبرو پر مهال وویل، کېدای شي له عمران خان سره ملاقات شوی وای، ځکه ملاقات دومره لویه مسئله نه ده، اصلي مسئله ترهګري او هغه زرګونه کسان دي چې د ترهګرۍ له امله وژل کېږي. نوموړي وویل چې په خیبر پښتونخوا کې هره ورځ خلک وژل کېږي او د صوبې حکومت باید د ترهګرۍ پر وړاندې مسؤلیت پر غاړه واخلي او اغېزمن اقدامات وکړي. عطا تارړ تور ولګاوه چې د خیبر پښتونخوا حکومت له تېرو ۱۳ نیمو کلونو راهیسې د ترهګرۍ پر وړاندې لازم اقدامات نه کوي. هغه پوښتنه وکړه چې د اپکس کمېټې د غونډې د رابللو مخه د صوبايي حکومت څوک نیسي؟ وفاقي وزیر وویل چې له سهیل افریدي سره خبرې پایلې ته ونه رسېدې او ادعا یې وکړه چې د خیبر پښتونخوا د وزیراعلیٰ او کابینې غړو ته مالي ګټې رسېږي. نوموړي زیاته کړه چې که پي ټي آی د حکومت شرطونه منلي وای، ښه به وه، او ادعا یې وکړه چې پي ټي آی ته پاکستان نه، بلکې افغانستان تر پاکستان ډېر ګران دی.