لاریونونه او پرلتونه پای ته ورسوئ، د خبرو لپاره چمتو یو، وزیراعظم بیا پي ټي آی ته د مذاکراتو وړاندیز

اسلام آباد (ویب نیوز) وزیراعظم شهباز شریف یو ځل بیا پاکستان تحریک انصاف ته د مذاکراتو وړاندیز کړی او ویلي یې دي چې که لاریونونه او پرلتونه پای ته ورسول شي، حکومت به له پي ټي آی سره خبرې وکړي. نوموړي په اسلام آباد کې یوې غونډې ته د وینا پر مهال وویل چې د دوه نیمو کلونو د هڅو او ګډ کار له لارې د هېواد اقتصاد باثباته شوی، خو د احتجاجونو له امله د صادراتو، وارداتو او تولیدي برخې د اغېزمنېدو اندېښنه شته. وزیراعظم وویل چې د پرلتونو او احتجاجونو سیاست به تر ټولو لومړی پر اقتصاد اغېز وکړي او د هېواد د پرمختګ بهیر بیا درول مناسب نه دي. هغه له پي ټي آی وغوښتل چې احتجاجونه پای ته ورسوي او ویې ویل چې له هغې وروسته حکومت د خبرو لپاره چمتو دی.