په ټانک کې په ډزو د پولیس افسر په ګډون درې کسان شهیدان، دوه ماشومان ټپیان؛ په کرک کې چاودېدونکي توکي شنډ شول

کوټه (وېب نیوز) د خیبر پښتونخوا د ټانک ولسوالۍ د ډبرې په کلي کې د نامعلومو وسله‌والو په ډزو کې د پولیسو د مرستیال سب‌انسپکټر نیاز محمد په ګډون درې کسان شهیدان شوي او دوه لاروي ماشومان ټپیان شوي دي. د پولیسو د چارواکو په وینا، نیاز محمد په جنوبي وزیرستان کې دنده ترسره کوله او په خپل شخصي موټر کې سراروغه ته روان و چې د ډزو هدف وګرځېد. د شهیدانو مړي او ټپیان د ضروري قانوني چارو او درملنې لپاره د ټانک ولسوالۍ مرکزي روغتون ته لېږدول شوي دي. بلخوا، د کرک ولسوالۍ په درګه شهیدانو سیمه کې پر سړک ځای پر ځای شوي چاودېدونکي توکي، چې د پولیسو پر ضد د برید لپاره اېښودل شوي وو، شنډ شوي دي. د پولیسو په وینا، د امنیتي ځواکونو پر وخت اقدام د یوې احتمالي ترهګریزې پېښې مخه ونیوله.