د مولانا فضل الرحمن د نوي میثاقِ جمهوریت د دریځ ملاتړ؛ د اپوزېسیون اتحاد موافقه وکړه

اسلام آباد (ویب نیوز) د اپوزېسیون اتحاد «تحریک تحفظِ آئین پاکستان» د مولانا فضل الرحمن د نوي میثاقِ جمهوریت د دریځ ملاتړ کړی دی. مولانا فضل الرحمن په اسلام آباد کې له یوه پلاوي سره د سېنېټ د اپوزېسیون له مشر علامه راجا ناصر عباس سره ولیدل. په دې کتنه کې د هېواد پر سیاسي وضعیت، اساسي او جمهوري چارو او د اپوزېسیون د ګوندونو پر خپلمنځي همکارۍ خبرې وشوې. ګډونوالو په خیبر پښتونخوا کې د بېړني حالت او ګورنر راج د لګولو غندنه وکړه او دا یې د ولسواکۍ او د ولس د واکمنۍ له اصولو سره په ټکر کې وبلل. دوی د وزیراعلیٰ، د صوبایي اسمبلۍ د سپیکر او د ملي او صوبایي اسمبلۍ د غړو پر نیولو اندېښنه څرګنده کړه او د سیاسي بندیانو د سمدستي خوشې کولو او د سیاسي ازادیو د ساتنې غوښتنه یې وکړه. په غونډه کې د ټولو ګوندونو د کنفرانس پر جوړولو هم سلا مشوره وشوه. ګډونوالو وویل چې له اوسنیو بحرانونو څخه د وتلو لپاره باید سیاسي ګوندونه د نوي میثاقِ جمهوریت پر لور عملي ګامونه واخلي. د تحریک انصاف په پلاوي کې بیرسټر ګوهر، اسد قیصر، بیرسټر علي ظفر، عامر ډوګر او زین قریشي شامل وو، په داسې حال کې چې د جمعیت علمای اسلام په پلاوي کې سېنېټر کامران مرتضیٰ، میر یونس زهري او عثمان بادیني ګډون درلود.