د جمعیت علماوو اسلام کارکوونکي دې د مولانا فضل الرحمن هرې پرېکړې ته لبیک ووايي، مولانا عبدالواسع

کوټه(ویب نیوز)د جمعیت علماوو اسلام بلوچستان د صوبايي عاملې او پارلماني غړو په غونډه کې د صوبې پر سیاسي، اقتصادي او امنیتي وضعیت اندېښنه څرګنده شوه او کارکوونکو ته سپارښتنه وشوه چې د ګوند د مشر مولانا فضل الرحمن هرې پرېکړې ته لبیک ووايي او د هر ډول احتمالي سیاسي وضعیت لپاره چمتووالی ولري. غونډه د صوبايي مشر سناتور مولانا عبدالواسع په مشرۍ وشوه. ګډونوالو وویل چې ناامني، بې‌روزګاري او د کاروباري فعالیتونو کمښت خلک له ستونزو سره مخ کړي دي. غونډې غوښتنه وکړه چې د مدرسو د ثبت قانون او د کانونو او معدنیاتو اړوند مسوده دې ژر د بلوچستان اسمبلۍ ته وړاندې شي. مولانا عبدالواسع وویل چې جمعیت به د اساسي قانون د برلاسۍ، ولسي حقونو، جمهوري ارزښتونو او دیني هویت د ساتنې لپاره خپل رول ته دوام ورکوي.