ژوب (نوی ژوند): د جمعیت علماء اسلام (ف) په غوښتنه د مدرسو د رجسٹریشن، ماینز اینډ منرل ایکټ او د مولانا محمد ادریس د شهادت په ضد په ژوب کې بشپړ شټر ډاون هڑتال وشو چې له امله یې د ښار ډېری سوداګریز مرکزونه، مارکېټونه او دوکانونه بند وو او د ژوند عادي چارې اغېزمنې شوې وې، د تفصیلاتو له مخې د جمعیت علماء اسلام کارکونکو په ښار کې لاریون وکړ چې پر بېلابېلو لارو له تېرېدو وروسته مرکزي چوک ته ورسېد او هلته یوه ولسي غونډه جوړه شوه، په دې موقع امنیتي تدابیر هم نیول شوي وو او انتظاميې پر وضعیت کله نظر ساتلی و، ولسي غونډې ته د جے یو آئی ضلعي امیر مولوي سرور، مولوي آدم او مولانا الله داد ویناګانې وکړې او د مدرسو د رجسٹریشن او ماینز اینډ منرل ایکټ په اړه یې خپلې سختې اندېښنې څرګندې کړې، ویناوالو وویل چې دا اقدامات د دیني مدرسو او ځايي کانونو په ضد دي چې په هیڅ صورت به ونه منل شي، هغوی د مولانا محمد ادریس شهادت وغندلو او د پېښې د رڼو تحقیقاتو او د مسوولینو په ضد د اقدام غوښتنه یې وکړه، مقررینو زیاته کړه چې دا هڑتال د ولسي غبرګون نښه ده او تر څو چې غوښتنې نه وي منل شوې د احتجاج لړۍ به روانه وي، هغوی له کارکونکو وغوښتل چې نظم او ضبط وساتي او خپل پرامن احتجاج ته دوام ورکړي.
