په قلات کې په تېره یوه میاشت کې شاوخوا ۳۰ موټرونه تښتول شوي، خو د پولیسو په ریکارډ کې یوازې د ۵ قضیې ثبت دي

کوټه (نوې ژوند ویب نیوز) د قلات او شاوخوا سیمو د امنيتي وضعیت د خرابېدو او د موټرو د غلا او تښتونې د پېښو له زیاتېدو وروسته ولسي او ټولنیزو حلقو سختې اندېښنې څرګندې کړې دي. د سیمې اوسېدونکي وایي چې په تېره یوه میاشت کې نږدې ۳۰ موټرونه غلا یا د وسلو په زور تښتول شوي، خو د پولیسو په رسمي ریکارډ کې یوازې د ۵ موټرو مقدمې ثبت شوې دي. د اغېزمنو کسانو په وینا، کله چې دوی د خپلو غلا شویو یا تښتول شویو موټرو د راپور لپاره پولیسو ته مراجعه کوي، نو د نوو قضیو له ثبتولو ډډه کېږي. ولسي او ټولنیزو فعالانو ویلي چې د جرمونو د اصلي شمېر پټول د ستونزې حل نه دی او له صوبايي حکومت او لوړپوړو چارواکو یې غوښتي چې د قلات د پولیسو له مسؤلینو څخه وضاحت وغواړي او د ټولو پېښو د ثبت او د امن د ټینګښت لپاره جدي ګامونه پورته کړي.