په زهري کې د بي اين پي د مشر پر کور چاپه، سردار نصیر موسیاني له زامنو سره نیول شوی؛ ساجد ترین اېډوکېټ

کوټه (نوې ژوند ویب نیوز) د بلوچستان نېشنل پارټۍ (بي اين پي) مرکزي سینیئر مرستیال ساجد ترین اېډوکېټ په کوټه پریس کلب کې خبري غونډې ته ویلي چې د خضدار د بلبل زهري په سیمه کې د ګوند د مشر، پخواني ضلعي ناظم او د موسیاني قبیلې د مشر سردار نصیر احمد موسیاني پر کور د ځواکونو چاپه، د هغه وهل ټکول او له زامنو سره یې نیول د غندنې وړ عمل دی. نوموړي ادعا وکړه چې له وسله‌والې نښتې وروسته امنیتي ځواکونه د سردار نصیر کور ته ورغلي، هلته یې هغه ټپي کړی او زامن یې هم نیولي دي. ساجد ترین وویل چې ګڼ نور کسان هم نیول شوي او په یوه ښوونځي کې ساتل کېږي. هغه زیاته کړه چې بي اين پي به د خپلو سیاسي او جمهوري حقونو لپاره مبارزه روانه ساتي او د نیول شویو کسانو د خوشې کولو، د پېښې د شفافو پلټنو او د امنیتي اقداماتو د بیاکتنې غوښتنه یې وکړه. نوموړي اعلان وکړ چې ګوند به د جون په ۴مه په ټول بلوچستان کې احتجاجي مظاهرې وکړي.