په کوټه کې د ځمکې لاندې د اوبو کچه خطرناکې کچې ته راټیټه شوې، کارپوهانو د اوبو بیړني حالت خبرداری ورکړ

کوټه (ویب نیوز)کارپوهانو خبرداری ورکړی چې په کوټه او د بلوچستان په نورو سیمو کې د ځمکې لاندې د اوبو کچه د اندېښنې وړ حد ته راټیټه شوې او یوازې د روان اوړي په موده کې له ۸ تر ۱۰ فوټه نوره هم ښکته شوې ده، چې له امله یې د سختې اوبو کمښت وېره زیاته شوې ده. د کارپوهانو په وینا، د نفوسو زیاتوالی، ناقانونه بورونه، د بارانونو کموالی، د نويو اوبو زېرمو نه جوړېدل او د ریچارچ نظام نشتوالی د اوبو د چټک کمېدو لامل شوی دی. هغوی وایي چې د ښار په ګڼو سیمو کې خلک څو څو ورځې له اوبو بې‌برخې وي او شاوخوا ۸۸ سلنه کورنۍ د واټر ټینکرو پر اوبو تکیه کوي. کارپوهانو او اوسېدونکو له بلوچستان حکومته غوښتي چې د ناقانونه بورونو او ټینکر مافیا پر ضد دې سخت اقدام وکړي، د واسا خراب ټیوب‌وېلونه دې ورغوي، د بندونو او ریچارچ پروژې دې ژر عملي کړي او اغېزمنو سیمو ته دې د اوبو عادلانه وېش یقیني کړي.